Thursday, June 5, 2008

Extension of Philippine Comprehensive Agrarian Reform Program (CARP)

Gipangayo na usab sa Malakanyang gikan sa Kongreso nga ipalabang na ang balaodnon nga maglugway og laing lima ka tuig sa pagpatuman sa flagship social reform program sa kagamhanan nga Comprehensive Agrarian Reform Program (CARP).

Ang CARP, nga gipatuman sukad pa niadtong 1988, ug gilugwayan na ug lima ka tuig motapos sa umaabot nga Hunyo 10.

Sa pagtak-op niini nga programa, kapin kon kulang 200 mil ektaryas pa ang mahimong ipailawom sa CARP ug kini maoy gitumbok nga ipang-abod-apud pa sa minilyon ka Pilipino nga mag-uuma. 

Tungod sa dako nga tabang sa pagpanag-iya sa yuta nga tikaron sa mga kabus karon, ug sa katakus niini nga haw-ason ang nasud sa kalisud, gilagdaan ni Presidente Gloria Macapagal-Arroyo isip dinalian nga balaodnon nga nagpangayo sa laing lima ka tuig nga lugway sa CARP. 

Kini saysay ni Press Secretary Ignacio R. Bunye human gisuwatan sa Malakanyang sila Senate President Manuel Villar ug House Speaker Prospero Nograles aron lihokon ang lakang ug aprobahan na ang House Bill 4077.

Ang House Bill nga gisugyot sa Malakanyang nga aksyonan sa Kongreso subay sa rekomendasyon nga sukip sa usa ka taho sa House's committee on agrarian reform. 

Ang bag-ong balaodnon nagpahimutang sa pundo alang sa subsidized credit sa mga benefisaryo sa agrarian reform ug mag-ila na sa mga babaye isip legal nga benepisaryo sa programa.

Gisukip na usab sa HB 4077 ang mga reporma nga nasugyot human has-hasi ang mga suliran sa pagpatuman sa CARP sa milabayng katuigan. - Rey Anthony Chiu - PIA Bohol

No comments: