Pa-imbestigahan sa Malacanang ang gikataho nga dinagko nga pagpanipig sa bugas nga National Food Authority sa Mindanao nga miresulta sa artificial nga pagkuwang sa supply ug sa pagsulbong sa presyo sa bugas sa kinatibuk-ang rehiyon.
Ang mandu sa imbestigasyon giluwatan gilayon ni Presidente Gloria Macapagal-Arroyo ngadto sa National Bureau of Investigation (NBI) kinsa gitahasan nga makig-alayon sa NFA sa pag-patin-aw sa una na nga mga taho, padayag ni Deputy Presidential Spokesperson Lorelei Fajardo.
Kini dungan na usab sa iyang bahad nga bisan si kinsa ang masakpan, o dudahan sa pagtipig patawan sa bug-at nga silot.
Ang lakang, matud ni Fajardo mao lamang ang pagmatuod sa saad sa kagamhanan nga panalipdan ang interes sa labing baga nga katawhan.
Sa taho sa mga opisyales sa NFA sa Mindanao, ang pagnihit sa tinubdan sa humay dala sa illegal nga pagtipig niini sa mga negosyante kinsa naglantaw nga makapaak sa ganansya sa higayon nga ila na nga buhian ang bugas sa merkado. - Rey Chiu - Philippine Information Agency
No comments:
Post a Comment