Dili na kinahanglan pa nga mopalit ang mga ginikanan ug uniporme sa ilang mga anak ilabi na kadtong mosulod sa grade 1 ug mga bag-ong estudyante.
Kini kay gimandu na ni Presidente Gloria Macapagal Arroyo ngadto sa Department of Education (DepED) nga dili na estriktohon ang pagpatuman sa uniporme sa mga bata arong makalingkawas ang mga ginihanan sa dugang palas-anon sa pagpa-eskwela sa ilang mga anak.
Sa iyang pakigpulong, giluwatan sa Presidente ang pamahayag samtang iyang gihatagan ug bili ang pag-ugmad sa edukasyon isip lig-ong haligi sa pag-pamuhunan sa imprastraktura ug sa katawhan aron hingpit na nga gun-obon ang talikala sa kawad-on sa nasud.
Kini nga lakang sa pagpaluag sa pagpatuman sa uniporme gituohan nga makakunhod pa sa galastohan sa mga ginikanan ilabi na sa panahon nga nagmahal ang paliton.
Una na usab nga gisugyot sa presidente kang DepED Secretary Jesli Lapuz ang paglugak sa palisiya sa uniporme.
Kini bisan pa nga daghang ginikanan nga nagtuo nga mas maka-ekonomiya ang ginikanan sa uniporme kay dili na nagsige og panglaba sa mga lain-laing biste nga isuot matag adlaw. - Rey Chiu - PIA
No comments:
Post a Comment